കടം

കടംകൊണ്ട ഭാഷ കടംകൊണ്ട ഛായ
കടം വീട്ടുവാൻ ഞാൻ വിയർക്കുന്ന പ്രേമം
കടംകൊണ്ട ധാന്യം ധനം ധർമ്മബോധം
കടം കൊണ്ട ധ്യാനത്തടാകക്കവാടം


രതിക്കും മൃതിക്കുംഇടയ്ക്കേകലോക-
ക്കിനാവിന്റെ വസ്ത്രം ധരിച്ചും അഴിച്ചും
കടക്കാടു കൊത്തിക്കിളച്ചും കയർത്തും
തുടിക്കുന്നനേരം കടച്ചിതൽ കാണാം

കടക്കോഴി കൂവിത്തെളിക്കും പ്രഭാതം
കടത്തോക്കു പൊട്ടുന്ന യുദ്ധപ്രദേശം
കടംകൊണ്ട മിക്സി കടംകൊണ്ട സ്കൂട്ടർ 
കടം വന്നു മൂടുന്നു കണ്ണും മനസ്സും


കടംകൊണ്ട മോഹപ്പിറപ്പായ ദു:ഖം
നടാതെ തഴക്കും ഋണത്തിന്റെ സസ്യം
പരാധീനമെന്‍ ജീവവൃക്ഷം സുലക്ഷ്യം
തരാനുണ്ട് വീടാക്കടത്തിന്റെ അന്നം

കടപ്പെട്ട പാഠം പഠിക്കാതെ വയ്യ
കടപ്പെട്ട നെൽവിത്തളക്കാതെ വയ്യ
കടപ്പെട്ടു ഭ്രൂണം മുലപ്പാൽ യുവത്വം 
വിലപ്പെട്ടതെല്ലാം മുടിക്കാതെ വയ്യ

കടത്തിൽ കുളിച്ചാണു നിൽപും നടപ്പും
കടക്കട്ടിലിൽതന്നിരിപ്പും കിടപ്പും
നടന്മാർ കടം നാടകം കുടിക്കുമ്പോൾ
നടുങ്ങുന്നു ഞാനെൻ കടപ്പാട്ടിനൊപ്പം

വരും ജപ്തിനോട്ടീസ്, തപാൽക്കാരി, മൃത്യു
ഗഡുക്കൾ, സുഹൃത്തിന്റെ ജാമ്യം നിഷിദ്ധം
വരുംകാലസ്വപ്നം കടംവെച്ചു പായും-
കൊടുങ്കാറ്റിനൊപ്പം പദം വെച്ചുപോകാം


പടത്തിൽ നിണച്ചായമെന്നപോലല്ല
നിലത്തിൽ വളച്ചാമ്പലെന്നപോലല്ല
ശ്വസിക്കാൻ കടം കൊണ്ടൊരോക്സിജൻപോലെ
കടത്തിൻ കുടത്തിൽ കുടുങ്ങുന്നു ജൻമം